Аднапавярховая Амерыка

Частка семнаццатая

Паміж Лос-Анджэлесам, штат Каліфорнія, і Маямі, штат Фларыда, знаходзіцца шлях працягласцю 2740 міль. Без перапынку праз штаты Арызона, Нью-Мексіка, Аклахома, Луізіана, Місісіпі і Алабама пераадолець яго можна мінімум за 40 гадзін. Тры штата з шасці мы ўжо наведалі. Памятаеце? Калі нешта ўпусцілі, зазірніце ў «Нататкі вандроўніка» нумароў «ТБ» ад 12 траўня, 16 і 30 чэрвеня. Таму спосабам «арол або рэшка» вырашылі не прыехаць у Фларыду, а прызямліцца.

Перш-наперш аўтамабіль, што дапамог нам атрымаць асалоду ад Route 66, перамагчы снег, схавацца ад пясчанай буры і спякоты, мы здалі ў пракатную кампанію. Працэс заняў некалькі хвілін. Спецыяліст прыёму хутка агледзеў знешні выгляд, праверыў узровень паліва (бак павінен быць поўны) і здзівіўся лічбам прабегу. У параўнанні з еўрапескімі пракатнымі канторамі амерыканская Alamo не патрабуе чысціні салона і адсутнасці драпін ад каменьчыкаў на кузаве. Развітвацца з нашым Dodge Durango RT не хацелася. Гэта было развітанне не з пракатным аўтамабілем, а з яскравым падарожжам, з прыгожымі месцамі і з адчуваннем шчасця і свабоды. Мабыць гэта і ёсць «амерыканская мара». І яна была ў нас і з намі. Каб доўга не сумавалі, бясплатны Shuttle-bus падхапіў нас і адвёз у аэрапорт… Як там надвор’е ў Фларыдзе?

У Фларыдзе за тыдзень да нашага візіту гаспадарнічала «Ірма». Hurricane Irma – магутны атлантычны трапічны цыклон. Самы працяглы ўраган 5 катэгорыі за ўсю гісторыю назіранняў і самы смяротны атлантычны ўраган сезона ўраганаў 2017 года. Хуткасць ветру дасягнула 297 км/г (хуткасць парываў ветру – 360 км/г. Падчас існавання «Ірмы» упершыню з 2010 года паўтарылася сітуацыя, калі ў Атлантычным акіяне знаходзілася адразу тры ураганы: «Каця», «Ірма» і «Хасэ». Ураган выклікаў катастрафічныя разбурэннi на астравах. На Барбуда і Сен-Мартэне разбурыў або пашкодзіў больш за 90% будынкаў, больш за палову жыхароў засталіся без прытулку. Улады Фларыды абвясцілі эвакуацыю для 6,3 млн чалавек (больш за чвэрць ўсяго насельніцтва штата). Ураган прайшоўся па заходнім узбярэжжы, выклікаўшы моцныя разбурэнні на архіпелагу Фларыда-Кіс і паводкі ў Маямі і іншых гарадах.

У пяцёрку амерыканскіх гарадоў, дзе верагоднасць урагану або шторму вышэй за ўсё, ўваходзяць і Маямі, і Кі-Уэст. Трэба сказаць, што жыхарам Маямі ў апошнія гады вельмі моцна вязе. Ураганы праходзяць на адлегласці 20–50 міль ад узбярэжжа. Шэраг ініцыятыўных груп нават прапаноўваў мэру горада і губернатару Фларыды афіцыйна перагледзець будаўнічыя нормы нерухомасці, якія з’яўляюцца аднымі з самых жорсткіх у Злучаных Штатах. Гэтая мера магла б зрабіць дамы больш даступнымі па цане і падняць будаўнічы бізнес. Аднак ні адзін палітык афіцыйна не падтрымаў гэтую ініцыятыву, паколькі адсутнасць урагану ў Маямі –дакладная прыкмета таго, што ён абавязкова абрынецца на горад у будучыні. У Кі-Уэсце ураган праходзіць раз у шэсць гадоў. Вiдавочцы апісваюць тое, што адбываецца, як «пекла на зямлі». Паколькі Кі-Уэст з’яўляецца востравам у чарадзе маленькіх архіпелагаў, тэарэтычна ён можа цалкам сысці пад ваду. Разам з тым пейзаж там у сонечны дзень чароўны. Гэта адзін з самых прыгожых курортаў у свеце, дзе мараць адпачыць многія турысты. Адпачнем і мы там, але пазней.

Першае ўражанне ад Майамі – вільготнасць: экран тэлефона і акуляры адразу запацелі. У будынку аэрапорта камфортныя ўмовы падтрымліваюць кандыцыянеры. Як высветлілі пазней, кандыцыянер ў Майамі – сродак першай неабходнасці. Яны паўсюль і такія магутныя, што ў гандлёвых цэнтрах з’яўляецца жаданее набыць не купальнік, а рукавіцы і шапкі.

Маямі займае тэрыторыю паміж трапічнымі балотамі раёна Эверглейдс на захадзе і Атлантычным акіянам – на ўсходзе. Горад стаіць на рацэ Маямі ў паўднёва-ўсходняй частцы аднайменнага паўвострава. З моманту заснавання ў 1896 Маямі імкліва рос, і цяпер гэта адзін з самых вядомых у свеце цэнтраў, дзе людзі могуць працаваць, жыць і адпачываць, атрымліваючы асалоду ад высокай якасцi жыцця. Маямі вядомы як «Чароўны горад» (Magic City). Горад атрымаў усеагульную вядомасць і сярод рускамоўнага насельніцтва.

Расiйскiя зоркі эстрады ў Маямі ўтварылі цэлую калонію. Першаадкрывальнікам быў кампазітар Ігар Мікалаеў. Ён амаль дваццаць гадоў таму купіў у Маямі кватэру. Затым на куплю вырашыліся і члены сям’і Алы Пугачовай: сваю нерухомасць набылі сама Ала Барысаўна, Крысціна Арбакайтэ і Філіп Кіркораў. Наплыў звычайных суграмадзян нават вымусіў Алу Барысаўну прадаць амерыканскую кватэру – усё роўна адпачыць паўнавартасна, каб цябе не пазнавалi на пляжы, не атрымліваецца. А Філіп Кіркораў, наадварот, да свайго пентхаўса дадаў у мінулым годзе асабняк у прэстыжным раёне. Спявачка Ірына Алеграва нядаўна стала гаспадыняй прасторных апартаментаў. Наогул жа, купіць дом у Маямі не праблема. Пасля маскоўскіх коштаў амерыканскія не палохаюць. Складаней утрымліваць нерухомасць. Кожны месяц трэба плаціць падатак як мінімум дзесяць тысяч даляраў. А дадайце да гэтага асабістую яхту, асабісты кабрыялет і нават асабісты верталёт – атрымаецца вельмі істотная штомесячная сума.

Нашым прытулкам стаў апарт-гатэль. Нумар у iм абсталяваны кухняй: каб зэканоміць час на пошуках ежы. Кошт нумароў і кватэр у арэнду залежыць ад месцазнаходжання і ад сезону, не гледзячы на тое, что сонечныя дні ў Фларыдзе – і зімой, і летам. Дзякуючы «Ірме», калі можна так сказаць, падчас нашага візіту цэны на арэнду знізіліся. Горад ужо ў большасці сваёй ліквідаваў наступствы стыхыі, толькі месцамі валяліся зламаныя галiны і сарваныя ветрам какосы. «Беласнежныя пляжы» – так літаральна крычаць, заклікаючы турыстаў у падарожжа, рэкламныя білборды. Насамрэч мы пабачылі наступную карціну. Вялізныя кучы водарасцяў ля самай вады шчыльнай коўдрай схавалі ад нас пясок. Яны былi і ў вадзе ля берага. Але неба! Яно неверагодным чынам – так, як гэта здараецца толькі на выспах, адбівалася ў роўнядзі вады. Вогненныя, лавандавыя і бэзавыя закаты прымушалі сэрца біцца часцей. А ноччу зоркі дазвалялі дакрануцца да сябе рукой.

Вось так прырода лютуе ўраганамі, не шкадуе нічога і нікога. І адначасова дорыць прыгажосць і спакой пасля буры. Дзякуй, «Ірма», што сышла да таго, як мы прыляцелі ў Майямі.

Працяг будзе

Таццяна СЯМАШКА